ವಾಣಿಜ್ಯ LPG ಸಿಲಿಂಡರ್ ಬೆಲೆ ತಕ್ಷಣ ಇಳಿಕೆ ಮಾಡಿ: ಕೇಂದ್ರ ಸರ್ಕಾರಕ್ಕೆ ರಾಜ್ಯ ಹೋಟೆಲ್‌ ಸಂಘ ಮನವಿ
ಜಾಗತಿಕ ಕಚ್ಚಾ ತೈಲದ ಬೆಲೆಗಳು ಇಳಿಕೆಯಾಗಿರುವ ಹಿನ್ನೆಲೆಯಲ್ಲಿ, ಈ ವರ್ಷದ ಫೆಬ್ರವರಿ ತಿಂಗಳಲ್ಲಿ ಇದ್ದ ಮಟ್ಟಕ್ಕೆ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯನ್ನು ತಕ್ಷಣ ಇಳಿಸಬೇಕು ಎಂದು ಕರ್ನಾಟಕ ರಾಜ್ಯ ಹೋಟೆಲ್‌ಗಳ ಸಂಘ (KSHA) ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದೆ.
ಕೆಎಸ್‌ಎಚ್‌ಎ ಅಧ್ಯಕ್ಷ ಜಿ.ಕೆ. ಶೆಟ್ಟಿ, ಫೆಬ್ರವರಿ ತಿಂಗಳಲ್ಲಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ನ ಅಧಿಕೃತ ಬೆಲೆ ಸುಮಾರು 1,800 ರೂ. ಇತ್ತು. ಆದರೆ, ವಿತರಕರಿಂದ ದೊರೆಯುತ್ತಿದ್ದ ರಿಯಾಯಿತಿಯ ನಂತರ ಹೋಟೆಲ್‌ಗಳು ಪ್ರತಿ ಸಿಲಿಂಡರ್ ನ್ನು 1,650 ರಿಂದ 1,700ರೊಳಗೆ ಖರೀದಿಸುತ್ತಿದ್ದವು ಎಂದು ತಿಳಿಸಿದರು.
ನಂತರ ಅಮೆರಿಕ–ಇರಾನ್ ಸಂಘರ್ಷದ ಪರಿಣಾಮ ಜಾಗತಿಕ ಅನಿಲ ಸರಬರಾಜು ತೀವ್ರವಾಗಿ ವ್ಯತ್ಯಯಗೊಂಡಿತು. ಆರಂಭದಲ್ಲಿ ಸರಬರಾಜು ಗಣನೀಯವಾಗಿ ಕುಂಠಿತಗೊoಡು, ಬಳಿಕ ಕ್ರಮೇಣ 20%, 50% ಹಾಗೂ ಸುಮಾರು 70% ಮಟ್ಟಕ್ಕೆ ಚೇತರಿಸಿಕೊಂಡಿತು.
ಈ ವ್ಯತ್ಯಯದ ಪರಿಣಾಮವಾಗಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯಲ್ಲಿ ಭಾರೀ ಏರಿಕೆ ಕಂಡುಬoದಿತು. ಪ್ರಸ್ತುತ ಹೋಟೆಲ್‌ಗಳು ಮತ್ತು ಉಪಾಹಾರ ಗೃಹಗಳು ಪ್ರತಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗೆ 2,198 ರೂಪಾಯಿ ಪಾವತಿಸುತ್ತಿದ್ದು, ಇದು ಕೆಲವೇ ತಿಂಗಳುಗಳ ಹಿಂದೆ ಪಾವತಿಸುತ್ತಿದ್ದ ಮೊತ್ತಕ್ಕಿಂತ ಸುಮಾರು ಎರಡು ಪಟ್ಟು ಹೆಚ್ಚಾಗಿದೆ.
ಈಗ ಜಾಗತಿಕ ಕಚ್ಚಾ ತೈಲದ ಬೆಲೆ ಮತ್ತೆ ಪ್ರತಿ ಬ್ಯಾರೆಲ್‌ಗೆ ಸುಮಾರು 70 ಅಮೆರಿಕನ್ ಡಾಲರ್‌ಗಳಿಗೆ ಇಳಿದಿದ್ದು, ಇದು ಫೆಬ್ರವರಿಯ ಮಟ್ಟಕ್ಕೇ ಸಮಾನವಾಗಿದೆ. ಆದ್ದರಿಂದ, ಅದರ ಅನುಗುಣವಾಗಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯನ್ನೂ ಕೇಂದ್ರ ಸರ್ಕಾರ ಕಡಿಮೆ ಮಾಡಬೇಕು ಎಂದು ಅವರು ಒತ್ತಾಯಿಸಿದರು.
Comments