ವಿಜಯಪುರ: 'ಥೈಲ್ಯಾಂಡ್ ಮಾವಿನ ತಳಿ' ಬೆಳೆದು ವರ್ಷವಿಡೀ ಆದಾಯ ಗಳಿಕೆ; ರೈತ ನವೀನ್ ಯಶೋಗಾಥೆ!

ಋತುಗಳನ್ನು ಅವಲಂಬಿಸಿರುವ ಇತರ ಮಾವು ಬೆಳೆಗಾರರಿಗಿಂತ ಭಿನ್ನವಾಗಿ ನವೀನ್ ಥೈಲ್ಯಾಂಡ್ ಮಾವಿನ ತಳಿಯನ್ನು ಬೆಳೆಸುತ್ತಾರೆ ಅದು ವರ್ಷವಿಡೀ ಫಲ ನೀಡುತ್ತದೆ.

ಥೈಲ್ಯಾಂಡ್ ಮಾವಿನ ತಳಿಯ ತೋಟದಲ್ಲಿ ರೈತ ನವೀನ್

ವಿಜಯಪುರ: ಬಹುತೇಕ ಜನರಿಗೆ ಮಾವು ಸಾಮಾನ್ಯವಾಗಿ ಬೇಸಿಗೆಯ ಹಣ್ಣು. ವರ್ಷದ ಉಳಿದ ಅವಧಿಯಲ್ಲಿ ಸಿಗದೆ ಅಲ್ಪಾವಧಿಗೆ ಮಾತ್ರ ಲಭ್ಯವಿರುತ್ತದೆ. ಆದರೆ ಮಹಾರಾಷ್ಟ್ರದ ಸೊಲ್ಲಾಪುರದ ನಿವಾಸಿ ಮಹೇಂದ್ರ ಮಿರಜಕರ್ ಅವರು ಮಾವಿನ ಹಣ್ಣುಗಳನ್ನು ಖರೀದಿಸಲು ವಿಜಯಪುರ ಜಿಲ್ಲೆಯ ಶಿವಣಗಿ ಗ್ರಾಮಕ್ಕೆ ಏಪ್ರಿಲ್ ಅಥವಾ ಮೇನಲ್ಲಿ ಮಾತ್ರವಲ್ಲ, ಮಳೆಗಾಲವಾದ ಆಗಸ್ಟ್ ನಲ್ಲಿಯೂ ಬರುತ್ತಾರೆ. ಅವರ ವೈಯಕ್ತಿಕತೆ ಈ ಪ್ರವಾಸಕ್ಕೆ ಕಾರಣವಾಗಿತ್ತು.

ಅಮೆರಿಕದಲ್ಲಿ ವಾಸಿಸುವ ಮಿರಜ್ಕರ್ ಅವರ ಮಗ ಎರಡು ವರ್ಷಗಳ ನಂತರ ಭಾರತಕ್ಕೆ ತನ್ನ ಕುಟುಂಬದೊಂದಿಗೆ ಭೇಟಿ ನೀಡಿದ್ದರು. ಅವರಿಗೆ ಮಾವಿನ ಹಣ್ಣು ಅಂದ್ರೆ ಅಚ್ಚುಮೆಚ್ಚು. ವರ್ಷವಿಡೀ ಬೆಳೆಯುವ ಮಾವಿನ ತಳಿಯೊಂದನ್ನು ರೈತರೊಬ್ಬರಿಂದ ತಿಳಿದ ಮಿರಜ್ಕರ್ ತನ್ನ ಮಗನಿಗೆ ಸರ್ ಪ್ರೈಸ್ ನೀಡಲು ನಿರ್ಧರಿಸಿದರು. ನನ್ನ ಮಗನಿಗೆ ಮಾವಿನ ಹಣ್ಣೆಂದರೆ ತುಂಬಾ ಇಷ್ಟ. ಮಾವಿನ ಹಣ್ಣಿನ ಸೀಸನ್‌ನಲ್ಲಿ ಹಣ್ಣುಗಳ ಬಾಕ್ಸ್‌ಗಳನ್ನು ಕೊರಿಯರ್ ಮೂಲಕ ಕಳುಹಿಸುತ್ತೇವೆ. ಆದರೆ ಈ ಬಾರಿ ಅವರು ಭಾರತಕ್ಕೆ ಭೇಟಿ ನೀಡಿದಾಗಿನಿಂದ ಆಗಸ್ಟ್ ನಲ್ಲಿ ಆತನ ನೆಚ್ಚಿನ ಹಣ್ಣನ್ನು ನೀಡಿ ಅಚ್ಚರಿಗೊಳಿಸಲು ಬಯಸಿದ್ದೆ ಎಂದು ಮಿರಜ್ಕರ್ ಹೇಳಿದರು.

ಶಿವಣಗಿ ಗ್ರಾಮದಲ್ಲಿ ಅವರು ಹುಡುಕುತ್ತಿದ್ದ ಸಂಪೂರ್ಣವಾಗಿ ಮಾಗಿದ, ನೈಸರ್ಗಿಕವಾಗಿ ಸಿಹಿಯಾದ ಮತ್ತು ಸುಗಂಧಭರಿತ ಮಾವಿನಹಣ್ಣುಗಳನ್ನು ರೈತ ನವೀನ್ ಮಂಗನವರ್ ಅವರ ತೋಟದಲ್ಲಿ ನೋಡಿದ್ದಾರೆ. 45 ವರ್ಷದ ನವೀನ್, ಕೃಷಿಯಲ್ಲಿ ಅದ್ಬುತ ಬದುಕು ಕಟ್ಟಿಕೊಂಡಿದ್ದಾರೆ.

ಸವಾಲಿನ ಪ್ರಯೋಗ: ಋತುಗಳನ್ನು ಅವಲಂಬಿಸಿರುವ ಇತರ ಮಾವು ಬೆಳೆಗಾರರಿಗಿಂತ ಭಿನ್ನವಾಗಿ ನವೀನ್ ಥೈಲ್ಯಾಂಡ್ ಮಾವಿನ ತಳಿಯನ್ನು ಬೆಳೆಸುತ್ತಾರೆ ಅದು ವರ್ಷವಿಡೀ ಫಲ ನೀಡುತ್ತದೆ. ಸಾಂಪ್ರದಾಯಿಕ ಭಾರತೀಯ ಪ್ರಭೇದಗಳಾದ ಅಲ್ಫೊನ್ಸೊ, ಬಂಗನಪಲ್ಲಿ ಅಥವಾ ರಸಪುರಿ ಬೇಸಿಗೆಯ ತಿಂಗಳುಗಳಲ್ಲಿ ಮಾತ್ರ ಕಾಣಿಸಿಕೊಂಡರೆ, ಥೈಲ್ಯಾಂಡ್ ತಳಿ ವರ್ಷವಿಡೀ ಫಲ ನೀಡುತ್ತದೆ. ಇದನ್ನು ಬೆಳೆಯಲು ವರ್ಷದ ಹಿಂದೆ ಹೇಗೆ ಯೋಚನೆ ಬಂದಿತು ಎಂಬುದನ್ನು ನೆನಪಿಸಿಕೊಳ್ಳುವ ನವೀನ್, ಬಿಎ ಪದವಿಯನ್ನು ಮುಗಿಸಿದ ನಂತರ ನೆಟ್‌ವರ್ಕ್ ಮಾರ್ಕೆಟಿಂಗ್ ಕಂಪನಿಯೊಂದರಲ್ಲಿ ಕೆಲಸ ಮಾಡಲು ಬೆಂಗಳೂರಿಗೆ ತೆರಳಿದರು. ಹೀಗೆ ಕೆಲಸ ಮಾಡುತ್ತಾ 2011 ರಲ್ಲಿ ಥೈಲ್ಯಾಂಡ್‌ಗೆ ಹೋಗಿದ್ದರು. ಆ ಸಮಯದಲ್ಲಿ, ಡಿಸೆಂಬರ್‌ನಲ್ಲಿ ತಾಜಾ ಮಾವಿನ ಹಣ್ಣುಗಳ ಮಾರಾಟ ನೋಡಿ ಆಶ್ಚರ್ಯವಾಯಿತು. ಅವುಗಳಲ್ಲಿಯೂ ನಿಜವಾಗಿಯೂ ಉತ್ತಮ ರುಚಿ ಇರುತ್ತದೆ. ಚಳಿಗಾಲದಲ್ಲಿ ರೈತರು ಮಾವಿನ ಹಣ್ಣು ಬೆಳೆಯಲು ಹೇಗೆ ಸಾಧ್ಯ ಎಂದು ನಾನು ಆಶ್ಚರ್ಯ ಪಡುತ್ತಿದ್ದೆ ಎಂದು ಅವರು ಹೇಳಿದರು.

ಇನ್ನಷ್ಟು ಕಲಿಯಲು ನಿರ್ಧರಿಸಿದ ನವೀನ್ ಮುಂದಿನ ವರ್ಷಗಳಲ್ಲಿ ಆರು ಬಾರಿ ಥಾಯ್ಲೆಂಡ್‌ಗೆ ಭೇಟಿ ನೀಡಿದರು. ಪ್ರತಿಯೊಂದು ಬಾರಿಯೂ ಕೃಷಿ ತಂತ್ರಗಳು ಮತ್ತು ಕೃಷಿ ನಿರ್ವಹಣೆ ಬಗ್ಗೆ ತಿಳುವಳಿಕೆಯನ್ನು ಆಳಗೊಳಿಸಿತು. ಸ್ಥಳೀಯ ರೈತರೊಂದಿಗೆ ಸಂವಾದ ನಡೆಸಿ, ಅವರ ವಿಧಾನಗಳನ್ನು ಅಧ್ಯಯನ ಮಾಡಿದೆ. ಥೈಲ್ಯಾಂಡ್ ನಲ್ಲಿ ಸುಮಾರು 50 ವಿಧದ ಮಾವಿನಹಣ್ಣುಗಳನ್ನು ಎಲ್ಲಾ ಋತುಗಳಲ್ಲಿಯೂ ಬೆಳೆಯುತ್ತಾರೆ. ಅವರು ಅದನ್ನು ಮಾಡಲು ಸಾಧ್ಯವಾಗುವಾಗ ನಾನು ಕೂಡಾ ಅದನ್ನು ವಿಜಯಪುರದಲ್ಲಿ ಪ್ರಯತ್ನಿಸಬೇಕು ಎಂದು ನಿರ್ಧರಿಸಿದೆ" ಎಂದು ಅವರು ವಿವರಿಸಿದರು.